這個網誌原是為我們旅行度假記下點滴，留下美好回憶。想不到一場武漢肺炎疫症，令到好多人的旅程夢想未能如願。更想不到我們在疫情大流行下的旅程，竟然是拿著BNO移民到英國。
我兩隻貓貓一向見到陌生人都會非常驚青，情緒失控，養咗10年都唔可以一抱入懷，10年來從未出過街街，基本上連睇獸醫都係冇可能，帶佢地搭飛機移民根本係諗都唔洗諗，加上手續超級麻煩。本來諗住將佢地暫放家人度，待settle 好之後一有直航機位，就返香港接佢地走。但因為種種限制，最後決定都係齊上齊落。
而當我們經歷整個旅程之後，我們發現原來佢地最需要係有我地陪住佢地，亦證明我們齊上齊落的決定是對的。
本來怕煩怕出錯，係諗住搵agent 搞，但多月來不斷學習各樣資訊之後，發現原來自己搞都可以應付得來，而且响呢個機位緊張的情況下，根本agent 都幫唔到D乜，而且收費太昂貴。準備行程的時候，正值英航、國泰都暫停寵物運送，幾乎絕望之際，在Youtube睇到有人竟然由荷蘭坐的士入英國，心想香港人真的好厲害，路果然是由人行出來的，於是我們努力搜集這方面的資訊。
出發前三個月，貓貓就開始接受特訓，我地就定時帶佢地出街行下，俾佢地適應家外嘅世界。貓貓不許人抱，唯有等佢地自己走入寵物袋後，馬上拉鏈夾佢地出街。感恩每次睇醫生、去機場、落船，佢地都好乖適當時候行入個袋到，等我地可以順利完成今次旅程。
出發前2個月，終於要帶佢地去睇獸醫打針同埋入晶片，很感恩一切都順利，貓貓亦沒有任何不良反應。
出發前8日，準備好所有文件，小心填form，亦都順利搞掂獸醫同漁護處嘅加簽。
由於獸醫話會在加簽文件之後，放一個月大假，即是如果漁護處彈返我嘅申請，就要搵另一個獸醫重新做過加簽手續。所以我和獸醫都十分謹慎處理每項細節。
所需文件：
1. 機票證明
2. 船票證明
3. 漁護署 動物健康證書申請表 AF300 Form
4. 針卡
5. GB Pet Healh Certificate Form
6. EU Annex Form
7. 獸醫寫的 Fit to fly letter
8. 同埋因為貓貓經是SPCA CCC Program 領養，有AVID 晶片，所以請醫生另外寫貓貓身上有嘅AVID 同 ISO Chip No.
9. 現金約$1300 for 2 份 form
其中7、8 漁記冇講明要睇，不過我照交晒俾counter，職員亦全部收晒。值得留意係寫明經荷蘭入英國，漁記才會處理 GB 同 EU 兩份form。
當天早上獸醫加簽完，下午2點半到達漁記辦理文件，响深水埗踎到5點都冇收到漁記電話，即是申請沒有問題，可以第二日再來攞返文件。
我地行嘅路線係坐漢莎經Frankfurt ，轉機去Amsterdam。然後再由Amsterdam坐的士去DFDS 碼頭，坐船前往Newcastle。
離港當晚，差不多要出發的時候，其中一隻貓仲未肯入寵物袋，用了很多方法都未引到佢入局，但又不想夾硬捉佢入袋，心裏很是著急，唯有黙黙祈禱。很奇妙，我離開房間一會之後，他竟然乖乖瞓响個袋入面，我連忙關上拉鏈，出發前往機場。
去到機場Lufthansa 櫃枱，地勤只係幫佢地連袋磅重，同埋詢問一聲貓貓可唔可以轉到身。我答可以，因為之前都聽過有網友講，有航空公司要求貓貓即場表演轉身，我上機前亦拍咗段片，影住貓貓响袋轉身嘅片段，以備出示俾地勤睇。但最後都冇需要去片。Counter 亦只係睇EU Annex Form，同埋即場收每隻$1000 寵物機位費用。
我地係用呢款袋，在Amazon 買：
https://www.amazon.com/gp/product/B087G7J7LP/ref=ppx_yo_dt_b_asin_image_o00_s00?ie=UTF8&psc=1
我地亦擔心過個袋太大，放唔落櫈底；但又擔心過細，轉唔到身。於是預備多2款袋到機場，2隻貓即是有6個袋。但最後都唔洗臨場換袋。
另外兩款袋:
細袋 - https://detail.tmall.com/item.htm?id=41335376507&spm=a1z09.2.0.0.4c6f2e8dBvRMyY&_u=62m9v5q21320
大袋 - https://detail.tmall.com/item.htm?id=599079725593&spm=a1z09.2.0.0.4c6f2e8dBvRMyY&_u=62m9v5q2fe85&sku_properties=122216750:42189994
貓貓响飛機上雖然顯得緊張，只係勉強舔下肉泥，我間中用個膠兜倒少少水俾佢地飲，佢地只係淺嘗一兩啖。香港去Frankfurt 嘅航班好少人，只係~20% full 左右，可以將寵物袋拉開，佢地可以瞓得舒服。全程13小時都算很易渡過。
但落機轉機就有一大考驗，德國海關人員要求我地放貓出來檢查，但我地求情話隻貓好怕人，一定會走失，希望可以在一間房進行。關員請示上級之後，就帶我地入一間房。好在早有準備多個大袋跟身，我地將貓由原本個袋，倒落另一個袋。俾關員檢查原本個Amazon袋。檢查完就將貓貓倒返入Amazon 袋，然後再倒另一隻貓。總算又過咗一關。
响Frankfurt 轉機都算多人，check passport都排咗半小時。搞咗一輪，再等咗2小時左右，便登上飛機前往Amsterdam。但往Amsterdam 的航機是細機，不是泊在登機橋，要坐巴士出停機坪登機，再行樓梯上機。拎住兩隻貓再加隨身行李，Frankfurt 機場亦沒有手推車提供，轉機過程都幾辛苦。
在Frankfurt 等轉機
飛機1小時就到達Amsterdam，都係要行樓梯落機，然後行樓梯上登機橋。機場好在有手推車，可以一路推出入境大堂。
荷蘭海關都幾hea，响度玩手機，係我主動話有2隻貓先做野，如果唔係都可以自由入境。關員只係求其睇下份EU Annex Form，用scanner scan 下隻貓嘅晶片，再核對一下Form 上嘅Number，就响Form上蓋印。
入境之後約11am，在機場有好多餐廳，吃了個午餐，再安頓一下1:30pm 便坐的士前往DFDS碼頭。貓貓也可以吃點肉泥和飲水。
由於行李不算太多，兩大喼加兩小喼，再加2隻主子，所以普通的士就可以了。車程約半小時，車費90歐元。司機同我講佢都未去過碼頭，好在我寫低咗碼頭嘅地址，順利到達。
DFDS 碼頭地址：Felison Terminal, Sluisplein 33, Ijmuiden, NL 1975 AG, The Netherlands
DFDS 碼頭 check in counter
碼頭check in counter職員都會要求睇下GB Health Certificate，同埋會俾個chip scanner 我幫貓貓 scan 晶片。確保貓貓可以順利入境英國。
大約4pm左右，乘客就可以登船。我地book 咗一個Pet Cabin，房間好細，但總算可以舒舒服服瞓一晚，有獨立廁所浴室。最最最緊要係貓貓都可以放出來鬆一鬆。
我們預備了少量貓砂同一塊紙皮，摺了一個盒做貓廁所。貓貓見到有貓砂就立即跳入去大小便，由出門到上船，足足捱足30小時都未有去過廁所，雖然貓袋內有尿墊，但貓貓始終唔肯响袋度大小便咁失儀，真係辛苦咗佢地。貓貓响房內都好肯食野。
船上走廊
所以我強烈推薦坐船，不建議坐Pet Taxi，這對人和寵物都會舒服一點。而我們2人2貓一房，連自助晚餐+早餐，都只係約£250，比坐Pet Taxi 平好多好多。
船上的自助晚餐和早餐都非常好食，食物選擇多。船上亦有戲院、遊戲室和小賣店。船也很穩定，沒有暈浪的感覺。只是落船後幾天，偶爾仍會感到搖晃的感覺，過幾天便沒事了。
我們和貓貓好好休息了一晚之後，我們在船上一面享用美味的早餐，一面靜候黎明來到光復這潻黑的大海，太陽隨隨升起，迎接我們在英國的新生活。
落船的英國海關檢查了我們的GB Pet Health Certifcate 之後，便順利入境。出碼頭後，我們在Newcastle的朋友便開車載我們到英國的住處。
經歷足足48小時的旅程，我們終於成功帶2隻貓貓一起移民英國了。當中有好多憂慮和無可預計的變卦，令人費盡思量，所以希望呢篇短短網誌，可以幫助同路人。
整個寵物移民計劃，洗費如下：
獸醫入晶片打針 : 2 x $1300
獸醫加簽：2 x $1000
漁護署加簽：2 x $650
Lufthansa Pet in Cabin 收費 : 2x $1000
DFDS Pet in Cabin ticket (2人2貓連自助晚餐早餐) : $2700
Amsterdam to Airport to Ferry Terminal Taxi: $900
兩隻貓都只係用咗$11500!!
